काठमाडौँ । चैत १५ गते रिलिज हुने नेपाली फिल्म ‘डोरी’ को ट्रेलर सार्वजनिक गरिएको छ । आइतबार काठमाडौँको नयाँ बानेश्वरस्थित आइएनआइ सिनेमाजमा आयोजित एक समारोहका बिच ट्रेलर सार्वजनिक गरिएको हो । कार्यक्रममा फिल्मका लेखक, निर्देशक कलाकार अरुण लामा, अञ्जना बराइली, प्रवीण खतिवडा, शिशिर बाङ्देल, साजन श्रेष्ठ, वीरेन्द्रसिंह कुशवाहा, राज पौडेल, राज थापा, नूतन, शारदा अधिकारी, रामबाबु रेग्मी, सङ्गीतकार तथा गायक राजनराज सिवाकोटी लगायतको उपस्थिति थियो ।

प्रायः सबै पात्रहरूलाई प्रस्तुत गरिएको ट्रेलर फिल्मको शीर्षक वरपर घुमेको छ । डोरीलाई शक्ति रहेको स्थितिमा सबैले खोजी गरिरहेको देखाइएको छ । सोही क्रममा आइपर्ने घटनाक्रमहरू प्रमुख रूपमा उठान गरिएको छ भने पारिवारिक तथा सामाजिक व्यवधानहरू समेत ट्रेलरमा देखिन्छ । ट्रेलरमा केही थ्रिल तथा हरर दृश्यहरू समेटिएका छन् ।

निर्देशक अरुण लामाले थ्रिल र हररलाई ‘दाल भात तरकारीमा चटनी प्रयोग गरेर स्वादिलो बनाएको जस्तो’ तरिकाले राखिएको बताए । उनले थपे, ‘यो कथा पूर्णतया सामाजिक हो र कहीँ न कहीँ सबैको जीवनसँग मेल खान्छ । ‘डोरी’को लेखन तथा निर्देशन अरुण लामाले गरेका हुन् । चलचित्रमा अरुण आफैँले प्रमुख भूमिका निभाएका छन् भने प्रवीण खतिवडा, शिशिर बाङ्देल, प्रकाश घिमिरे, अरुण लामा, अञ्जना बराइली, राज पौडेल, कविता आले, नूतन, राज थापा, वीरेन्द्रसिंह कुशवाहा लगायतका कलाकारको मुख्य भूमिका रहेको छ ।

फिल्मका निर्माता दिनेश भट्टराई हुन् भने कार्यकारी निर्माता राज थापा रहेका छन् । फिल्मका एक्सन निर्देशक राजु तामाङ, सङ्गीत निर्देशक राजनराज सिवाकोटी, कला निर्देशक रोशन दिवाना, सम्पादक मिलन श्रेष्ठ छ ।